Alla Itolae Nusa 42
Kena Yakupe ilene esi alena be mpai Mesire manane boka hoko ibeteke loko eni nanaru be,
“Imi limese lomai ele meije yake. Imi keu sabe manane mina.”
Kai iombe,
“Au lene be mpai Mesire manane me, hoko imi keu lope leke sabe manane ete ite leke ite mata manane yake.”
Eleki Yusupe kwalini sie butu esa esi keu lopai Mesire kena sabe manane.
Po Yakupe isuka le Benjamine, Yusupe kwalini muli mere kena ikeu sakesa kai kwalinisi mo le Yakupe rilai tinake isupu susate me lalane.
Hoko bei tamata rebe esi luake kena sabe manane me Mesire ete mere lekwe Israele eni nanaru esi me le me tape Kanane susa manane lekwe.
Eleki kena Yusupe kwalinisi luake mpai Mesire, kena mere Yusupe iono elake kena pletae tamata Mesire peneka hoko iabelie manane ete tamata rebe esi luake me Mesire kena sabe manane. Hoko Yusupe kwalinisi luake loko Yusupe kai esi tatu roma tapele beini.
Eleki kena Yusupe iselu kwalinisi, irenasi po iono lupe tamata rebe irekwasi mosa. Hoko ilepa lokosi tiktili be,
“Imi bei etia?”Esi ralake Yusupe be,
“Ntuane, ami bei ndi Kanane. Ami lomei kena sabe manane.”Masike Yusupe irena kwalinisi po kwalinisi renai mo.
Eleki Yusupe inete loko eni kmanire kena kwalinisi. Eleki ibeteke lokosi be,
“Imire mata-mata. Imi luake lomei kena selu tapele meije be otoi andia pine raka more.”
Eleki esi ralake Yusupe be,
“Mo ntuane. Ami ono ele mere mo le ami luake lomei kena sabe manane.
Ami meiju kwalitoi. Amire tamata misete po mata-mata mo.”
Po Yusupe ibeteke lokosi be,
“Lemake! Imi luake lomei kena imi selu be otoi andia bei tapele meije rebe sae raka more.”
Eleki esi ombe,
“Mo! Ami meiju kwalitoi pusuma butu esa lesini lua, bei ama esa ndi Kanane po amiki kwali mulire irue kai ama yo amiki kwali esa ime moneka.”
Po Yusupe ibeteke lokosi be,
“Mo! Imire mata-mata.
Elemere hoko au teheke imi: au la loko Pirone be sepo kwalimi mulire iluake lomei mo, hoko imi keu bei otoi meije mo.
Ulake sae ileu rana kwalimi mulire yo imi maketaru rue kanduti ete meije. Leke rekwa be imi lepate tinai pibe mo. Sepo tinai mo hoko au la loko Pirone be imi meru mata-mata.”
Eleki Yusupe ikusue pususi kena buije petua telu.
Eleki petua telu pine Yusupe iulake koti kwalinisi. Eleki ibeteke loko kwalinisi be,
“Imi ono ele meije. Sepo imire tamata misete hoko sae kuesa bei imi irue kena buije eleyo maketaru leu keri manane ete imi lumatoini leke tiasi sene yake. Eleki kwalimi mulire imi kerini lomei eteku leke au rekwa be imi lepate tinai kai au bunu imi yake. Le rilaku le Alla.”Eleki esi ralake Yusupe be,
“Yele, ntuane.”[tolong lihat ayat sebelumnya]
[tolong lihat ayat sebelumnya]
Esi beteke loko lomai be,
“Meije ite supu dosa bei iteki kwali muli Yusupe le ite selu malerekeni kena ikotie bei ite leke ite lalema noai po ite lene lokoi mo. Hoko meije ite supu susate.”
Eleki Rubena ibeteke lokosi be,
“Petumilare au beteke etemi be, ‘Imi ono dosa ete kwetele mere yake.’ Po imi lene loko auku lepate mo. Hoko meije eni lalakwe etutuke ite meije pene.”
Po esi rekwa be Yusupe irekwa esi lepa loko lomaije mo le esi lepa kai Yusupe, esi tamata makete kena ihtolokele.
Yusupe ikeu beisi eleki irani. Eleki ileu lokosi irana Simone beisi eleki iulake esi lo balaiju me oaisu.
Eleki Yusupe iulake kute manane kena esi karunaru kai esi kepenaru kute suikelu papelake esi karunaru kai riluke masate etesi kena esi kanele me lalane. Eleki esi ono lulu Yusupe ibeteke.
Esi buake esi manane kena esi keledaiaru eleki esi keu bei mere.
Eleki kena esi ntulu me lalane tlaije, ile sae me iluta eni karune leke iala eni keledaije, iselu eni kepene me eni karune esi nanaije hoko hkutukeni.
Eleki iombe,
“Ei! Kwali, auku kepene esi leukele. Selu, emei auku karune!”Hoko kaplalesi kai esi limese lomai kai rarelesi kai esi beteke be,
“Alla iono saisa meije ete ite lekwe? Meije Alla Iriluke susate ete ite.”Eleki kena esi luake loko amasi Yakupe ndi Kanane eleki esi alenake pusue yelu rebe uono kenasi mpai Mesire be,
“Tamata rebe iono elake kai ikbasae Mesire ilepa loko ami kena ktiline kai iono ami lupe amire mata-mata kena otoi mere.
Po ami beteke lokoi be, ‘Ami meiju mata-mata mo, amire tamata misete.
Pusue ami kwalitoije ami butu esa lesini lua bei ama esa, kwali esa ime moneka kai kwali mulire irue kai ama ndi Kanane.’
Eleki tamata rebe iono elake kai kbasae Mesire mere ibeteke loko ami be, ‘Elemere hoko leke au rekwa be imire tamata misete hoko imi tolae sae leke irue kai au yo imi maketaru imi leu keri manane ete imi luma toini leke tiasi sene yake.
Eleki imi liku kwalimi mulire lomei loko au leke au rekwa be imire mata-mata mo po imire tamata misete eleki au sirie kwalimi rebe rue kai aure kai imi keu mei tapele meije sebei bei imi lalemi neka.’”
Kena esi sirie manane bei karunaru esi selu kantune maka kute kepene eru me karunaru esi nanaiju, esi kepenaru eru me kenae. Hoko pususi kai amai esi hkutukesi kai rilasi le tinake elake rebe ikbasae Mesire ibunusi.
Eleki esi ama Yakupe ibeteke lokosi be,
“Bei imi pine Yusupe kai Simone sirikesi. Yusupe ikeu loko imi, ime moneka, Simone ikeu kai imi, ime moneka. Meije imi liku Benjamine lekwe? Hoko au meije pine au supu pusue esi susataru!”
Eleki Rubena ibeteke loko amai be,
“Sebeie Benjamine ikeu kai au, namake au leukeni loko ama ale. Sepo au leukeni lomei lokomu mo hoko sebeie abunu Auku ana mokwai luaru neka.”
Po Yakupe ibeteke be,
“Auku anae mere ikeu sakesa kai imi mo, le kwalini menare imata peneka hoko lesike ruai, sepo isupu susate me lalane tlai rebe imi keuele hoko mere imi bunu au elake inai ulu putile meije le au susa.”